L'HORRU y LA PANERA: mobiliariu ausiliar de la casería y comuñal nos pueblos.

L'horru y les paneres son construcciones tradicionales asturianes que d'antañu emplégase como graneru pa guardar la collecha y angäño tán casi ensin usu. Puen considerase como mobiliariu ausiliar yá que pue montase y desmontase d'un llau pa otru. Nun se ye a entender la casería o el paisaxe asturianu ensin horros o paneres, alcontrándose miles dellos esparcíos per tola xeografía asturiana. Nos pueblos yeren compartíos en comuña polos vecinos y vecines. Son elemntos del nuestru padremuñu qu'hai que caltener.

"Cuatro pates tien l'horru, seis pates tien la panera, cuatro pates tien la cama aú duerme la mio morena"

Delles partes más importantes del horru o la panera son:

L'horru y la panera estrémanse en que l'horru tien namás cuatro pegollos y la panera seis o más, ente otres coses y según l'estilu decorativu atopamos tres estilos: estilu Villaviciosa, estilu Carreño y estilu Allande.

Estilu Villaviciosa:
Esti estilu correspuende a los horros más antiguos conservaos (sieglu XIV y XVI) . Espárdense por:

Les carauterístiques más representatives del estilu se refiérense a la decoración de los lliños y colomdres copiando del románicu..

Estilu Carreño: constutúilu grandes paneres na zona costera del centru d'Asturies. Son los más tardíos:

Son los más espectaculares dende'l puntu de vista decoratiu.Les sos fachaes tán cobiertes por una guapa talla de florones, xarres y formes xeométriques pintaes y colores vivos.

Estilu Allande: esti estilu afáyase nel occidente interior d'Asturies espardiéndose por:

Tán datos dende mediaos del sieglu XVIII hasta el XIX. La decoración básase en motivos independientes alcontrándose estos principalmente nos llaterales de la puerta. Predominen les figures xeométriques tarabazaes con regla y compás: tetrasqueles, rosetes radiales o entrellazaos, toos ellos tradicionales.

Nel occidente asturiano tamién alcontramos l'horru galegu que na fastera contra l'Eo llámase cabazo.

Y estos son parte de los trabayos de les escolines y escolinos de llingua nel aula:

Y esti un cantar del grupu N'ARBA, (Danza de Salcéu) onde vemos que los horros y les paneres tienen muncha presencia na tradición oral asturiana:

Más info:

Centru d'interpretación del horru en Güeño (La Ribera) (visita mui afayadiza, al centru y al pueblu)

Pa saber más:
L'horru asturianu
horru

Pa pintar:
L'horru

Dibuxu de Desi 5u.A

Un artículu al rodiu l'horru

Xuan Pedrayes

Asturbulla 27-09-2010

Los graneros aéreos, ún de los símbolos más claros d’Asturies, desendolquénse nos cinco continentes

Los asturianos consideramos el nuesu horru una construcción singular y única; y ensin duldes ye-lo enforma, pero nun dexa de ser un graneru aereu, ún de los munchos granaria sublimia conocíos, como señalare’l profesor Tabanera en dos estudios ya clásicos incluyíos na so edición del llibru del antropólogu polacu Eugeniusz Frankowski, «Horros y palafitos de la península Ibérica».

Hubiere, y hai, horros n’Asia (Irán, Indochina, XapónÉ), África (Uganda, Madagascar, ChadÉ), Europa (Inglaterra, Macedonia, Hungría, Finlandia, RusiaÉ), Oceanía (Nueva Guinea, Melanesia), América (México, EcuadorÉ) y na península Ibérica (Navarra, Euskadi, Galicia y Portugal).

Repasemos el llugar que tuvieren y tienen los horros en mundu y pel tiempu.

Comida y la revolución neolítica

L’horru ye una arquiteutura universal qu’apaez cola llegada de lo que se llamare Revolución agrícola del Neolíticu (-10.000 a -4.000 a. X). A la llechi de los nómades amestáronse-y los cereales de l’agricultura asitiada: maíz n’América, panizu y trigu n’Europa, arroz n’Asia y sorgo n’África. La torta y la llechi fueren l’alimentu básicu neolíticu y, por ciertu, n’Asturies fuérenlo hasta hai cuatro díes. La historia de los horros ye consecuencia del usu de los cereales nes distintes civilizaciones.

La función del horru ye conservar la collecha granu nun espaciu con bones condiciones de ventilación, humedá y temperatura. Los horros más primitivos son más especializaos y pequeños, pero en faciéndose mayores recueyen usos más variaos: dispensa onde morcar alimentos, tendayu pa secar, y cola medra’l solhorru, esti sirvió de güecu y abellugu pa los aperios. Un graneru fáese horru n’asitiándose nuna plataforma ventilada perbaxo, que meyora les condiciones de conservación y protexe de los ratos. Los más cenciellos sepárense del suelu con piedres, unos maderos o llantaos enriba unos pilpayos. L’horru tien que ver cola comida. Y el comer ye sagrao. Ye un símbolu de la griesca ente l’home y la fame, como lo fuere Yun-kaax, el dios maya del maíz engarráu escontra los dioses de la seca, el vientu, el lloviu y la muerte.

Deméter la diosa griega de l’Agricultura; Quetzalcóatl, qu’entró nel inframundu pa robar el maíz y dáyos-lo a los homes; l’emperador míticu Sheng Nung, descubridor en China de la soja nel tercer mileniu a.X o el robu del ñame nel xardín de los dioses na Polinesia muestren el llugar señaláu que tienen los cereales y tubérculos nes cosmogoníes. Munchos pueblos consideraren los cereales un don de los dioses. El pan, la torta, ye un alimentu místicu y material n’eucaristíes y bacanales. L’horru ye un sagrariu, y como tolos sagrarios, tien llave; y delles veces camudó en templu: en 1936, l’arquiteutu tudescu Bruno Taut ya señalaba, nun estudiu sobre la vida xaponesa, l’aldéu ente los templos sintoístes, evolucionaos de los graneros tradicionales, y los horros suizos y suecos.

Anguañu, en munches etnies africanes atopamos horros de los anicios, xurdíos de la tradición neolítica de los pastores-agricultores. La sardera vexetal y el barru, principios xerminales, son los materiales emplegaos na so construcción.

Horros cesta

Los horros emprencipiaron siendo una goxa, una texeduría fecha de vanielles vexetales. Entaramingáu enriba d’una plataforma, la cesta fáese canastru. Hai munches clases d’ellos: n’Ourense y Portugal, los «kukuruzniak» serbios de los que falaba Frankowski, los horros texíos pelos mossi n’África, los cincolotes fechos pelos indios otomíes en México o el «sixi», versión andina d’un horru. Ésti ye un «troje» aymara fechu de «totora» p’almacenar el «chuño», pasta de fécula de patata, que sirve pa facer tortes.

De la cacía al horru d’adobe. En dellos tiempos y países, el graneru tamién escomencipió siendo cacía, pocu más qu’un pote. Llueu medró, fízose d’adobe y echó patuques, unos pilpayos. Los horros d’adobe son pequeños, tienen un solhorru perruín y la so puerte ye mui cenciella (delles veces séllenlos ensin más).

El maíz domesticóse en México hacia’l -8000 a.X. y nesi país hai cientos de variedaes d’élli, poro qu’en horros tienen muncha bayura. Los «cuexcomates» son una triba d’ellos. El so nome vien de la pallabra naualt «cuexcomatl», que significa olla de barru o llugar onde guardar. Fechos d’adobe, son daqué más qu’un pucheru con teyáu de paya y una pasera; entovía en sieglu XVII colocaben ídolos dientro pa que multiplicaren les panoyes. Cerque de Morelos, había un tipu d’horru pal maíz, llamáu «bescomatl», un «cuexcomatl» evolucionáu, un horru-pegollu esencial, col teyáu asemeyáu a dellos cabazos d’Ourense y cola so cella más diferenciada.

L’adobe, un barru meyoráu con paya y cuchu úsase dafechu n’Africa. Atopámoslu nos graneros de los Gumuz n’Etiopía; nos dogon en Malí, onde la puerte de maera ya tien un simbolismu destacáu; nos kassena en Burkina Faso o los senufo en Costa de Marfil pente munchos otros pueblos.

Capitolium et horrea

Los horros fueren perimportantes nes ciudades. N’organizaciones sociales complexes los impuestos cobrábense en granu. El so aprovisionamientu controláu espantare la fame n’años de males celleches. D’esta manera surtíense les grandes ciudades y los exércitos na Historia antigua; de los imperios babilónicos a Exiptu o Roma.

El status romanu conseguíase cuando nel foru la ciudá sometida llantábase’l capitoliu, colos templos dedicaos a la tríada capitolina (Xúpiter, Xuno y Minerva). Pero el ordo romanu afitábase na intendencia. Roma fuere una urbe fluvial, con un puertu na desembocadura del Tíber, Ostia, y un embarcaderu interior a la vera’l ríu llamáu Emporium. Nos dos puertos fabricaren los romanos nes dómines de Trajano «horrea» monumentales. Per tol imperiu una rede de horreum publicum garantizaba l’abastecimientu a la plebe romana y al exércitu. Los horros «a la romana» son edificios de maera o piedra onde’l so pisu sepártase del suelu pa meyorar l’aislamientu de la humedá.

Mugorizu asiático

El «funcionalismu climáticu» n’ecosistemes asemeyaos empobina a soluciones arquiteutóniques con poca variación, anque la tradición cultural aporta dellos cambios. N’Asia, col calor húmedo y el munchu lloviu, les sociedaes agraries, aplicando’l proverbiu del «mínimu recursu, máximu confort» allegaren al horru total: l’hamaca, una mena de cama-horru; cases, templos, graneros... asitiaos toos nuna plataforma escontra les humedaes, el calorizu y el barru. Nesos climas empleguen tamién teyaos enanchaos, de poca masa pa que nun pase’l calor pela nueche y dean sombra, parees cencielles y como material el bambú, vexetal a mediu camín ente la sardera y la maera. Los horros de los chin en Birmania, o los fechos pelos minangkabau del centro de Sumatra son bon exemplu de tou ello.

Pela Europa medieval

L’hachu y el llabiegu coraren la viesca europea, añegratada y pagana, faciéndonla pandu y güerta. Na colonización del arbolíu, l’home européu domesticó la viesca; la xeometría humana del horru impúsose a la retorcigañada Naturaleza. Xurdieren entóncenes horros de maera per toa Europa, de buen tamañu: «l’hebre» suecu, el «solek» polacu, horros n’Eslovenia, na Savoya, n’España, Italia, Suiza o Turquía. La funcionalidá y l’usu de los materiales empobinen al «isomorfismu arquiteutónicu» qu’esplica cómo soluciones paecíes apaecen en cultures separtaes miles d’años y kilómetros. L’empléu del mesmu sistema constructivu nos horros y nes viviendes d’una cultura danse tamién daqué. Dos casos particulares pela so parecencia colos horros asturianos son el de la provincía iraní de Gilan, asitiada a la oriella del mar Caspiu, y les choces de los ifugao en Filipines. En Gilan los sos horros, de teyaos pindios, danse un semeyu a los horros asturianos con teitu, y un tipu de vivienda irania desenrolla’l mesmu sistema constructivu emplegáu nos horros gilaníes. Cerque de la so capital, Rasht, acaba d’inaugurase la primera fase d’un muséu al aire llibre onde pueden vese estes arquiteutures. En cuantu a los «ifugao» de la isla de Luzón, son horros-vivienda, col so llar dientro. Na exposición filipina de 1887 llantaren nel Retiru madrilanu dalguna d’estes perguapes construcciones.

En Michoacán (México), los «trojes» camúdense en vivienda y son desmontables. N’Europa, los «mazots» suizos y los «stabur» noruegos, colos sos requilorios, desenrollen dacuandu usos mixtos casa-panera. Un casu estremu ye’l del pueblu toraja, na isla indonesia de Sulawesi; faen les sos cases (tongkonam), los sos horros (lumbung) y los sos catafalcos funerarios cola mesma forma.

Los horros siguen en plenu usu en munchos países. La FAO (Organización de les Naciones Xuníes pala Agricultura y Alimentación) entamó dende 1977 programes pa meyorar el diseñu de los horros tadicionales n’África y América; en 2005 repartiere n’Afganistán 14.000 silos metálicos. Hai fame a esgaya.

Arca y relicariu de cosmogoníes, l’horru ye un arquetipu (un obxetu colectivu) onde la Humanidá espanta la fame del so cuerpu y l’esmolimientu de la so alma. Los asturianos ya nun tamos esfamiaos, pero l’horru sí mos presta guapamente pa escorrer los nuesos mieos y acolumbrar, ellí lloñe, l’Asturies eterna.

Enllaz artículu Asturbulla