Tá acabante presentase un llibru mui prestosu: La hestoria del Anguleru (Ediciones Trabe). Vamos ver quien ye y por qué los neños y neñes lu quieren tanto...

Ye'l responsable de llevar los regalos a los neños y neñes asturianos en Nuechebona.

L'Anguleru anque ye asturianu vive tol añu na Mar de los Sargazos, cerca d'América, curiando de les anguiles y les angules, hasta que n'iviernu vien p'Asturies na so llancha: L'Angulina, na nueche del 24 d'avientu, en nuechebona, momentu qu'aprovecha pa pescar angula, vendela na rula y mercar regalos a los neños y neñes d'Asturies col dineru de les ganancies.

Vien per Navidá porque ye'l momentu nel que más angules pesca. Entra n'Asturies pel ríu Nalón onde los habitantes de L'Arena lu reciben nuna cabalgata. Dempués d'esti recibimientu percuerre tolos ríos, llagos y otros llugares pa visitar los llares asturianos. Pa reponer fuercies, los neños y neñes teneis que dexa-y un GORRU de LLANA a los pies del árbol de Navidá con COMIDA y BEBIDA.

Pinta al Anguleru

Más info: 

Facebook L'Anguleru

¿POR QUÉ L'Anguleru?

L'Anguleru foi un personaxe creáu pola Asociación Cultural Garabuxada, de L'Arena (Sotu'l Barcu), en 2008 al envís de potenciar una Navidá más cercana a la tradición asturiana. Escoyóse'l personaxe d'un anguleru por ser esti oficiu ún de los más carauterísticos de la llocalidá de L'Arena y por tar la pesca de l'angula mui venceyada a bona parte de la mariña asturiana, como manera d'identificar más fácilmente a la sociedá asturiana. Caberamente ta en procesu de consolidación por ser una figura motivadora pal deprendimientu de la llingua asturiana a les xeneraciones más nueves.

Antiguamente, mentes la pesca ivernal de l'angula, munchos anguleros emplegaben el sobresueldu de les ganancies pa mercar regalos a los neños. Sicasí, n'Asturies yá esistía constancia de personaxes navidiegos que se dedicaben a repartir regalos, especialmente nes mazcaraes d'iviernu.

Más info: Asociación Cultural Garabuxada